'బిళ్ళల పులుసు '

నేను వంటల గురించి ఏమీ చెప్పక పోవటం బాగాలేదు. నేను కూడా ఏదైనా ఒక వొంటకం చెప్పాలి. ఎలా? ఏదైనా ఒక మంచి పాతకాలపు వొంట రాయాలి. బాగుంటుంది. మరి నాకేమి రావే! మా అత్తగారి దగ్గర కాపీ కొట్టేస్తే సరి. తెలంగాణా వొంటలు బాగా చేస్తారు. ముఖ్యంగా ఆవిడ చేసే రెండు వొంటకాలు నాకు బాగా నచ్హుతాయి. ఒకటి 'బిళ్ళల పులుసు ', రెండోది 'పొట్లాల కూర '.

బిళ్ళల పులుసు గురించి రాయాలనిపిస్తోంది. సరిగ్గా గుర్తులేదు. ఇప్పుడేమొ మా అత్తగారికి ఓపిక లేక ఏమీ చేయటం లేదు. ఇవాళ సెకండ్ సాటర్ డే కాబట్టి మెల్లగా టిఫిన్లయ్యాక మొదలు పెడితే సరి అనుకున్నాను. ఇడ్లీ, చట్నీ చేసేసాను.

మెల్లగా మా అత్తగారి దగ్గరికి పోయి ఇవాళ బిళ్ళల పులుసు చేద్దామా! అని అడిగాను. సరే, చేసేయ్ ... అన్నారు. నా గుండెలో రాళ్ళు పడ్డాయి. నా కెక్కడ గుర్తుండేడిసింది.

నేను కొంచెం బతిమలాడుకుంటే మా అత్తగారు, ఏం అడిగిన వెంటనే చేసేస్తారు. దానికో కారణం ఉంది. మా అత్తగారి ముగ్గురు కొడుకుల్లో మా వారు చివరబ్బాయి. మా బావగార్లిద్దరు మా అత్తగారు ఎప్పుడు ఎక్కడికి తీసుకెళ్ళమన్న ఇప్పుడు టైం లేదు తరువాత చూద్దంలే అంటూ ఉంటారు. మా తోడి కోడళ్ళు ఇద్దరూ మారుమూల పళ్ళెటూళ్ళనుంచి వొచ్హారు. ఎప్పుడు బయటికి పోవాలన్నా వాళ్ళ, వాళ్ళ ఆయనలతో మాత్రమే వెల్తారు. ఇంక మా అత్తగార్ని ఏం తీసుకెల్తారు. అందరం వేరు వేరు ఇళ్ళల్లోనె ఉంటున్నాం లెండి. ఇంక మా వారు సరే సరి, ఎప్పుడు కంటికే కనిపించరు. ఎటొచ్హి మిగిలింది నేనే. ఆవిడ ఎక్కడికి పోతానన్న, ఎప్పుడూ కాదనకుండా ఇద్దరం హాయిగా చెట్టా పట్టాల్ వెసుకొని వెళ్ళిపోతాం. మా అత్తగారు కూడా 'భానుమతి అత్తగారంత ' హుషార్. అందుకే, అందరి మీదా ఆమెకి ప్రేమ సమానమే, కాని, నా మీద మాత్రం కొంచెం ఎక్కువ సమానం ప్రేమ అన్నమాట.

ఇద్దరం కలిసి చేద్దాం రండి అని కిచెన్ లోకి తీసుకెళ్ళాను.మాట్లాడకుండా నా వెనకాలే వొచ్హేసారు. మీరు చెప్పండి, నేను చేసేస్తూ ఉంటాను అన్నాను. ఇంతకి చింతపండు నానబెట్టావా లేదా! అన్నారు. వెంటనే నాలిక్కరచుకొని, లేదు..లేదు.. అని వెంటనే ఒక గుప్పెడు చింతపండు నానబెట్టేసాను. బేసన్ పౌడర్ (శనగ పిండి) కావాలి కదా అన్నారు. ఇక్కడ మా అత్తగారి గురించి కొంచెం చెప్పాలి. మా అత్త గారికి ఇంగ్లీష్ మీద ప్రేమ ఎక్కువ. వాళ్ళ నాన్నగారు లాయర్. ఆ రోజుల్లోనే తనని ఇంగ్లీష్ మీడియం స్కూల్లో చేర్పించారని ఎప్పుడూ చెప్తూ ఉంటారు. ఏదో విధంగా, ఎక్కడో అక్కడ ఇంగ్లీష్ పదాలు ప్రయోగిస్తూ ఉంటారు. వాళ్ళ నాన్నగారు మంచి ఫ్రాక్స్ తెప్పించేవారని, వాటి తో ఉన్న ఫొటోలు కూడా చూపిస్తూ ఉంటారు. తాను చాలా మోడ్రన్ అని మా అత్తగారి అభిప్రాయం. వాళ్ళ అత్తగారు చాలా కాలం వరకు తనని కిచన్ లోకే రానివ్వలేదట. వాళ్ళకి చాలా మడీ, ఆచారమని చెప్తూ ఉంటారు. తనకి ఎనిమిదవ ఏటే పెళ్ళి చేసారని, లేక పోతే ఇంకా చాలా చదివి ఎంతో గొప్పదాన్ని అయిఉండే దాన్నని అంటూ ఉంటారు.

సరె..సరే.. మన వంట లోకొచ్హేద్దాం. స్టౌ మీద వెజల్ (బాండీ) పెట్టూ అన్నారు. పెట్టాను. ఘీ (నెయ్యి) వెయ్యీ అన్నారు. ఈ రోజుల్లో అన్ని వంటల్లో ను నెయ్యి ఎక్కడ వాడుతున్నాం. సరేలే అని కొంచెం నెయ్యి వేసి, ఇప్పుడు పోపు చేయాలి కదా అన్నాను. కాదు శనగపిండి లో కొంచెం ఉప్పూ, ఖారం వేసి లిక్విడ్ చేయి అన్నారు. ఖారం కొంచెం తక్కువ వేయ్, అసలే మీ వారికి (వాళ్ళ అబ్బయికన్నమాట) ముక్కుమీద కోపం ఎక్కువ అన్నారు. మహా మీ వారికి ( మా మామ గారికి) కోపం తక్కువైనట్లు, అనుకొని, ఖారం కొంచెం తక్కువే వేసాను. మొత్తం కలిపేసి కొంచెం నీళ్ళ లాగా చేసాను . ఇప్పుడు దీన్ని బాండిలో వేయాలి అని నాకు తెలుసు. ఆ పని చేసి, కొంచెం గట్టిగా ముద్దలాగా అయ్యేవరకు కలుపుతూ ఉన్నాను. ఇంతలో మా అత్తగారు నా చేయి పట్టి ఆపేసారు. ఇంక చాల్లే మరీ గట్టిపడిపోతుంది అన్నారు. ఇప్పుడొక ప్లేట్ తీసుకొని, దాని కి మంచిగా నెయ్యి పట్టించి ఇది అందులో వేసెయ్యి అన్నారు. ప్లేట్ లో వేయగానే, మా అత్తగారు, నా చేతిలోనుంచి అట్లకాడ తీసుకొని, మొత్తం సమంగా పరిచారు. ప్లేట్ లో మొత్తం ఈక్వల్ గా ఇలా చేయాలి. ఇప్పుడు మైసూర్ పాక్ ముక్కల్లాగా కట్ చేయి అన్నారు. అన్నీ ఈవన్ గా, చిన్న చిన్న ముక్కలు డైమండ్ షేప్ లో కట్ చేయ్ అన్నారు. అలాగే చేసాను. ఇంక ఆ ప్లేట్ పక్కన పెట్టేయ్ అన్నారు.

ఈ లోపల మా అబ్బాయ్ వాడి టిఫిన్ ప్లేట్ తీసుకొచ్హి నా కళ్ళముందు ఆడిస్తూ అమ్మా! నాక్కొంచెం సుగర్ వెయ్ అన్నాడు. మా మామగారి ఒంట్లో పెద్ద సుగర్ ఫాక్టరీ యే ఉంది. అందుకని మాకు సుగర్ ఎక్కువ కొనే అవసరం లేదు. వాడి ప్లేట్లో ఉన్నది ఇడ్లీ. ఇందులో సుగర్ ఏంటిరా! అన్నాను. ఇంతలో సడన్ గా నాకు మురళిగారు గుర్తొచ్హారు. తను చిన్నప్పుడు ఒక ఇడ్లీ కి ఇంకో ఇడ్లీ అంత సుగర్ వేసుకొనే వారని రాసుకున్నారు. నాకు అదే గుర్తుకొచ్హింది. కాక పోతే నేను ఉప్మా మీద సుగర్ వేసుకొని తింటాను. ఇలా చాలా మందే తింటారను కుంటా. నేను ఆలోచన్లో పడిపోవటంతో మా వాడు, బామ్మా! నాకు సుగర్ వేయి అని వేయించుకొని మరీ వెళ్ళాడు.

ఇంతలో నేనూ, మా అత్తగారూ, కలిసి బిళ్ళల పులుసు చేస్తున్నామని గుర్తుకొచ్హింది. వెంటనే, ఆ చెప్పండి, చెప్పండి.. . తర్వాత ఏం చేయాలి అన్నాను. మిక్సీ లో మసాలా పౌడర్ చేసుకోవాలిగా అన్నారు. మిక్సీ బౌల్ ఏది అని అడిగారు. వెంటనే అందించాను. ఇందులో కొంచెం సాజీరా, జింజర్, ధనియా(ధనియాలు), కోకొనట్ పౌడర్, రెడ్ చిల్లీస్, లవంగాలు (ఆవిడకి దీనికి ఇంగ్లీష్ పదం తెలియదు) వేయాలి అన్నారు. కొంచెం దాల్చిన్ చెక్క,(దీనికి కూడా ఆవిడకి ఇంగ్లీష్ పదం తెలియదు) ఇది కాస్త ఎక్కువే వేయాలి. ఇవన్నీ కూడా అలాగే వేసేయ్ అన్నారు. అప్పుడే బాగుంటుంది అన్నారు. సరే... అన్నీ వేసేసాం. ఇంక గ్రైండ్ చేయి అన్నారు. మెత్తగా పేస్ట్ చేస్తూ కొంచెం వాటర్ ఎక్కువ పోయి అన్నారు. మెత్తగా జారుగా చేసేసాను. ఇంక ఇప్పుడేం చేయాలి! అన్నాను.

ఇంకో వెజల్ (ఈ సారి గిన్న అన్నమాట) తీసుకొచ్హి స్టౌ మీద పెట్టు అన్నారు. అలాగే పెట్టాను. టెఫ్లాన్ వెజల్ ఉందిగా, అది పెట్టు ... బాగుంటుంది... అన్నారు. సరే! అని గిన్న మార్చేసాను. ఇప్పుడు ఆయిల్ కొంచెం బాయిల్ చేసి పోపు వేయి అన్నారు. పోపు కొంచెం స్ట్రాంగ్ గా, ఇంగువ వేసి ఘుమ ఘుమ లాడేట్లు చేయి అన్నారు. తరువాత, తనే చింతపండు చిక్కగా రసం చేసి ఆ పోపు లో పోసారు. నేను ఇంకొంచెం నీళ్ళు పోసాను అందులో. ఆ పేస్ట్ అంతా ఇందులో వేసి బాగా మరగనియ్యి అన్నారు. ఆ కట్ చేసిన బిళ్ళలు కూడా ఇందులో వేసెయ్ అన్నారు. ఇప్పుడు మళ్ళీ వెజల్ లో కొంచెం ఆయిల్ వేసి కొన్ని డ్రై ఫ్రూట్స్ గోలించి పెట్టు అన్నారు.

ఇక్కడో సంగతి చెప్పాలి. మా పెళ్ళైన కొత్తలో మా వారు కొన్ని వేఫర్స్ తీసుకొని మా అక్కా వాళ్ళ ఇంటికి వెళ్ళి, " వదినగారు, కొంచెం ఇవి గోలించి పెట్టరా!" అన్నారుట. మా అక్క కి ఏం అర్ధం కాలేదు. ఈ గోలించటాలు, గోలీలాడటాలు ఏవిటబ్బా! అనుకుందట. మా అక్క అదే విషయం తిరిగి అడిగింది. ఏం చేయాలండీ, అని. దానికాయన ఏమి సమధానం చెప్పలేదు. దానికి పర్యాయ పదం ఆయనకీ తెలీదు మరి. వెంటనే కిచన్ లోకి వెళ్ళి, స్టౌ మీద బాండీ పెట్టి, ఆయిల్ వేసి తరువాత వాటిని "వేయించార" ట . అప్పుడర్ధమయింది మా అక్కకి గోలించటమంటే, వేయించటమని. కొన్ని ఆయన తిని, కొన్ని మా అక్క కిచ్హి వెళ్ళిపోయారట.

ఇప్పుడు నాకు గోలించటమంటే ఏవిటో బాగా తెలుసు కాబట్టి, అలాగే బాండీ లో కొంచెం నూనె పోసి, జీడి పప్పులు మాత్రమే కొంచెం వేయించి, తరువాత బాదం వంటి కొన్ని ఇతర డ్రై ఫ్రూట్స్ సన్నగా ముక్కలు చేసి ఉంచాను. ఇంక చాల్లే, ఎక్కువ బాయిల్ అయితే మాడు వాసన వొస్తుంది, తీసేయ్ అన్నారు. గోలించిన డ్రై ఫ్రూట్స్ అందులో కలిపేసి, కొంచెంగా కొత్తిమీర సన్నగా కట్ చేసి దానిమీద చల్లి ఒక హాట్పాక్ లోకి తీసి పెట్టేసాను. కొంచెం మా అమ్మాయికి పంపించు, మా అల్లుడికి చాలా ఇష్టం అన్నారు. మా ఆడపడుచు మా ఇంటికి దగ్గిర లోనే ఉంటుంది. అలాగే పంపిస్తానన్నాను.

హమ్మయ్యా! మొత్తానికి 'నేను సైతం ' ఒక వొంటకం చెప్పేసాను. చాలా, చాలా బాగుంటుంది. చేసేసుకొని తినేయండి. బాగలేకపోతే మాత్రం నన్ననకండే! ఎందుకంటే ఇది, ఎంతైనా కాపీ కొట్టేసిన వొంటకం కదా!.... కాని, ముచ్హటగా పాతకాలం వంటకాలు ఇష్టపడే వాళ్ళకి మాత్రం తప్పకుండా ఇది నచ్హి తీరుతుంది. నలుడో, భీముడో ఎప్పుడో దీన్ని చేసే ఉంటారు. ప్రవాసాంధ్రులు కూడా దీన్ని ప్రత్యేక వంటకంగా అక్కడి ఫ్రెండ్స్ కి వడ్డించుకోవచ్హు. (కొత్తపాళీ గారు, ఉషా గారు, భావన గారు, మంచుపల్లకీ గారు, etc., లాంటి వాళ్ళు)

***************************************************************************